بھارتی حکومت نے مقبوضہ جموں و کشمیرکے مرحوم رہنما سید علی گیلانی کی جماعت تحریک حریت جموں وکشمیر کوغیرقانونی قراردیتے ہوئے پابندی عائد کردی ہے۔ بھارتی حکومت کے مطابق تنظیم جموں و کشمیر کو بھارت سے الگ کرانا چاہتی ہے۔ پابندی کا اعلان کرتے ہوئے بھارت کے وزیر داخلہ نے کہا کہ حریت کانفرنس جموں و کشمیر کو بھارت سے الگ کرنے کی ممنوع سرگرمیوں میں ملوث تھی۔
بھارتی وزیر داخلہ نے جماعت پر بھارت میں اسلامی قانون نافذ کرنے کی کوششیں کرنے کا الزام بھی عائد کیا ہے۔ بھارتی سرکار کے بقول تحریک حریت جموں وکشمیر کو غیر قانونی سرگرمیوں میں ملوث ہونے پر کارروائی کا نشانہ بنایا گیا ہے ۔ یاد رہے کہ اس تنظیم کے پہلے روح رواں سید علی شاہ گیلانی تھے۔ بھارتی وزیرداحلہ نے پابندی کا اعلان کرتے ہوئے مزید کہا کہ یہ تنظیم بھارت مخالف پروپیگنڈا کر رہی ہے اور جموں و کشمیر میں علیٰحدگی پسند رجحان کو فروغ دینے کے لیے دہشت گردی کا سہارا لے رہی ہے۔ واضح رہے کہ بھارت کی انتہا پسند حکومت نے نے چند دن پہلے مسلم لیگ جموں و کشمیر (مسرت عالم گروپ) پر بھی پابندی عائد کردی تھی۔
