اسلام آباد انتظامیہ کی جانب سے ترنول اسلام آباد جلسے کا اجازت نامہ منسوخ کرنے پاکستان تحریک انصاف (پی ٹی آئی)کی جانب سے اسلام آباد میں آج ہونے والا جلسہ ملتوی کرنے کا اعلان کردیا گیا ۔ اسلام آباد میں پریس کانفرنس کرتے ہوئے پی ٹی آئی کے چیئرمین بیرسٹر گوہر نے کہا کہ ترنول جلسہ تحریک تحفظ آئین پاکستان کے پلیٹ فارم سے ہونا تھا جسے ملتوی کردیا ہے۔
انہوں نے کہا کہ اب عدالت سے درخواست کریں گے یوم عاشور کے بعد ہمیں جلسے کی اجازت دیں۔ بیرسٹر گوہر نے کہا کہ عدالت کے حکم کے بعد ڈی سی نے جلسے کا نوٹیفکیشن دیا۔ کمشنرکے پاس اختیار نہیں کہ اسے معطل کرے، جس لیٹر کو بنیاد بنا کر نوٹیفکیشن معطل کیا گیا اس لیٹر کو ہائیکورٹ میں پیش کرتے، ہم ہائیکورٹ اس لیے آئے ہیں کہ آئین اور قانون کے مطابق جلسہ کریں۔ بیرسٹر گوہر گوہر کا کہنا تھا کہ بانی پی ٹی آئی کے بغیر کوئی سیاست مکمل نہیں، آئین اور قانون کی بالا دستی کے لیے ہم سب کوشش کررہے ہیں۔
دوسری جانب انتظامیہ کی جانب سے ترنول اسلام آباد جلسے کا این او سی منسوخ کرنے پر پی ٹی آئی نے عدالت سے رجوع کر لیا ۔ اپوزیشن لیڈر عمر ایوب، بیرسٹر گوہر، عمیر نیازی، شہریار آفریدی اور ثنا اللہ مستی خیل کی جانب سے ہائیکورٹ میں درخواست دائر کی گئی۔ درخواست میں استدعا کی گئی کہ جلسہ کرنے کی اجازت دینے کے احکامات جاری اور فریقین کو عدالتی احکامات پر عملدرآمد کرنے کا حکم دیا جائے۔
