کراچی: سندھ پولیس کے افسران کیلئے میڈیا بریفنگ اور انٹرویوز کے لیے پیشگی اجازت لازمی قرار دیدی گئی.
آئی جی سندھ کے احکامات پر اے آئی جی آپریشن نے ہدایت نامہ جاری کردیا۔
سینٹرل پولیس آفس سے جاری ہدایت نامے میں بتایا گیا ہے کہ کوئی پولیس افسر آئی جی سندھ کی پیشگی اجازت کے بغیر میڈیا پر نہیں آ سکے گا۔
ہدایت نامے کے مطابق ٹی وی، ریڈیو پروگرام، پوڈکاسٹ اور پریس کانفرنس میں شرکت کے لیے پیشگی منظوری لازمی ہو گی۔
ہدایت نامے کے مطابق ڈیجیٹل میڈیا اور دیگر عوامی فورمز پر سرکاری حیثیت میں شرکت بھی پیشگی اجازت سے مشروط قرار دی گئی ہے.
اجازت لینے والے افسران صرف منظور شدہ ایجنڈے تک گفتگو محدود رکھیں گے۔
ہدایت نامے میں بتایا گیا ہے کہ جاری تحقیقات، انٹیلیجنس اور آپریشنل معاملات کی حساس معلومات ظاہر کرنے پر بھی پابندی عائد کی گئی ہے۔
تمام نگران افسران کو ہدایات پر سختی سے عملدرآمد یقینی بنانے کا حکم دینے کیساتھ بتایا گیا ہے کہ خلاف ورزی کو سنجیدگی سے لیا جائے گا، محکمانہ کارروائی بھی ہو سکتی ہے۔
