وفاقی دارالحکومت اسلام آباد سمیت پنجاب اور خیبر پختونخوا کے مختلف اضلاع میں زلزلے کے شدید جھٹکے محسوس کیے گئے ہیں۔
ذرائع کے مطابق ،زلزلے کے جھٹکے لاہور ملتان، فیصل آباد، میانوالی، بھکر، کمالیہ، خانیوال، بھلوال، چنیوٹ، حافظ آباد، ٹوبہ ٹیک سنگھ، گجرات، سرگودھا ،جھنگ اور دیگر اضلاع میں بھی زلزلے کے جھٹکے محسوس کیے گئے۔
خیبر پختونخوا میں پشاور، شمالی وزیرستان، ڈی آئی خان، لکی مروت، سوات، شانگلہ، بونیر، لوئر دیر، ملاکنڈ، ٹانک اور چترال میں بھی زلزلے کے جھٹکے محسوس کیے گئے۔ زلزلے کی شدت تیز ہونے کے باعث عوام گھروں اور دفاتر سے باہر نکل آئی اور کلمہ طیبہ کا ورد شروع کر دیا۔
زلزلہ پیما مرکز کے مطابق زلزلے کے جھٹکے دوپہر 12 بج کر 28 منٹ پر محسوس کیے گئے جس کی شدت 5.7 اور زیر زمین گہرائی 10 کلومیٹر ریکارڈ کی گئی، زلزلے کا مرکز ڈی جی خان کے قریب تھا۔
غیر ملکی خبر رساں ادارے کی رپورٹ کے مطابق ،زلزلے کے جھٹکے بھارتی دارالحکومت نئی دلی کے علاوہ اترپردیش، ہریانہ، بھارتی پنجاب اور مقبوضہ کشمیرمیں بھی محسوس کیے گئے ـ
