اسلام آباد: فیڈرل بورڈ آف ریونیو کے گریڈ 18 کےافسر کوراولپنڈی سے اغوا کر لیا گیا ہے اور اغوا کاروں نے رحمت اللہ خان کو چھوڑنے کے لیے اہل خانہ سے ایک کروڑ روپے تاوان کا مطالبہ کیا ہے۔
ایف آئی آر کے مطابق ان لینڈ ریونیو سروس کے گریڈ 18 کے افسر رحمت اللہ خان ایف بی آر ہیڈ کوارٹرز میں تعینات ہیں۔ ان کو 12 اپریل کو صبح ساڑھے گیارہ بجے نامعلوم افراد نے اغوا کیا گیا۔
پولیس کو دی گئی درخواست میں مغوی کے برادر نسبتی شفیق نے بتایا کہ بہنوئی سےرابطہ کرنے اور ان کا سراغ لگانے کی تمام کوششیں کی گئیں لیکن 12 اپریل سے کوئی سراغ نہیں مل سکا۔
پولیس نے درخواست پر 15 اپریل کو ایف آئی آر درج کی۔ ذرائع کے مطابق انہیں سندھی زبان بولنے والے ایک شخص کی طرف سے 10 ملین تاوان کے لیے کال موصول ہوئی ہے۔ اغوا کاروں نے بتایا کہ رحمت اللہ خان کچے کے علاقے میں ان کی تحویل میں ہیں۔ پولیس نے کارروائی شروع کر دی ہے۔
