پشاور (حسن علی شاہ) باوثوق ذرائع کے مطابق سابق وفاقی وزیر پٹرولیم سلیم سیف اللہ خان کو گورنر خیبرپختونخوا تعینات کیے جانے کا قوی امکان ظاہر کیا جا رہا ہے۔ اس سلسلے میں وفاقی حکومت کے ساتھ مشاورت کا عمل جاری ہے۔
ذرائع کا کہنا ہے کہ حال ہی میں اسلام آباد کے ایک نجی ہوٹل میں سلیم سیف اللہ خان کی جانب سے ایک عشائیہ دیا گیا، جس میں وفاقی وزرا، سینیٹرز، ارکان پارلیمنٹ اور اعلیٰ سرکاری افسران نے شرکت کی۔ اس تقریب میں جمعیت علمائے اسلام، پاکستان پیپلز پارٹی، مسلم لیگ (ن) اور مسلم لیگ (ق) سے تعلق رکھنے والی اہم سیاسی شخصیات بھی شریک ہوئیں۔
عشائیے میں انور سیف اللہ، ہمایوں سیف اللہ، جاوید سیف اللہ اور ڈاکٹر ہشام انعام اللہ سمیت دیگر نمایاں افراد کی شرکت بھی دیکھنے میں آئی۔
ذرائع کے مطابق سلیم سیف اللہ خان اس وقت لندن میں موجود ہیں، جہاں ان کا طبی معائنہ جاری ہے، اور توقع ہے کہ وہ جلد ہی وطن واپس آ جائیں گے۔
