ایبٹ آباد: ریسکیو 1122 ایبٹ آباد نے سیاحوں اور مقامی افراد کے لیے سفری ہدایات جاری کر دی ہیں۔
ڈسٹرکٹ ایمرجنسی آفیسر ایبٹ آباد جان محمد آفریدی نے بارش اور طوفان کے باعث سیاحوں اور مقامی لوگوں کے لیے سفری ہدایات جاری کر دیں جس میں کہا گیا ہے کہ شہری بارش کے دوران پھسلنے اور دوران سفر گاڑی کی بریک فیل ہونے سے بچنے کے لیے احتیاط سے ڈرائیونگ کریں کیونکہ پھسلن کی وجہ سے گاڑیوں کو مختلف حادثات پیش آ سکتے ہیں،آسمانی بجلی،طوفان یا آندھی کے آثار رونما ہوں تو گاڑی میں پناہ نہ لیں،برساتی ندی نالوں میں کوڑا کرکٹ مت پھینکیں اس سے طغیانی کا خطرہ بڑھ سکتا ہے۔
انہوں نے کہا کہ برساتی اور ندی نالوں و نشیبی علاقوں میں رہائش کے لیے تعمیرات مت کریں،پرانے اور بوسیدہ مکانوں میں رہائش مت اختیار کریں،بارشوں کے پانی کے نکاس کے لیے مناسب انتظام لازمی ہے،نمی کی وجہ سے دھاتی چیزوں اور بجلی کے آلات میں کرنٹ آ سکتا ہے جس سے بچنے کے لیے احتیاط ضروری ہے،بجلی کے کھمبوں اور پائپوں سے دور رہیں اور کسی قسم کی دھاتی چیز ہاتھ میں نہ پکڑیں۔
