راولپنڈی: سی پی او سید خالد ہمدانی کی ہدایت پر راولپنڈی پولیس نے شہر میں پتنگ سپلائرز کے خلاف کارروائیاں تیز کر دی ہیں۔ اس کے تحت مختلف مقامات پر چھاپے مار کر مجموعی طور پر 7 پتنگ سپلائرز کو گرفتار کیا گیا اور ان کے قبضے سے 3100 پتنگیں اور 12 ڈوریں برآمد کی گئی ہیں۔
رتہ امرال پولیس نے اپنی کارروائی کے دوران دو افراد کو حراست میں لے کر 2250 پتنگیں اور 4 ڈوریں برآمد کیں۔ ٹیکسلا پولیس نے ایک فرد کو گرفتار کیا اور اس کے قبضے سے 400 پتنگیں اور 2 ڈوریں حاصل کیں۔ واہ کینٹ پولیس نے سب سے زیادہ گرفتاری کرتے ہوئے تین افراد کو حراست میں لیا اور ان کے قبضے سے 200 پتنگیں اور 5 ڈوریں برآمد کیں۔
گوجرخان پولیس نے بھی ایک فرد کو حراست میں لے کر 250 پتنگیں اور 1 ڈور برآمد کی۔ گرفتار افراد کے خلاف الگ الگ مقدمات درج کر کے قانونی کارروائی شروع کر دی گئی ہے۔ پولیس کے مطابق یہ اقدامات شہر میں پتنگ بازی کے دوران پیش آنے والے حادثات اور خونی کھیل کو روکنے کے لیے کیے جا رہے ہیں۔
ترجمان راولپنڈی پولیس کا کہنا ہے کہ پتنگ بازی کو اب ناقابل ضمانت جرم قرار دیا گیا ہے اور جو بھی خونی کھیل میں ملوث پایا جائے گا، وہ قانون کی گرفت سے نہیں بچ سکتا۔ انہوں نے عوام سے اپیل کی ہے کہ وہ پتنگ بازی کے خطرناک عمل سے گریز کریں اور قانون پر عمل کریں۔
