اینٹی نارکوٹکس فورس ہیڈ کوارٹر کے ترجمان نے بتایا کہ انسداد منشیات فورس (اے این ایف) نے 11 کارروائیوں کے دوران 724 کلو گرام سے زائد منشیات برآمد کرکے 9 ملزمان کو گرفتار کیا۔ انہوں نے بتایا کہ اسلام آباد ایئرپورٹ سے شارجہ جانے والے مسافر سے 746 گرام چرس برآمد ہوئی۔ اسلام آباد ایئرپورٹ سے دبئی جانے والے مسافر سے ہیروئن سے بھرے 91 کیپسول برآمد کر لیے گئے جبکہ کراچی ایئرپورٹ پر چین جانے والے دو مسافروں سے 159 گرام چرس برآمد کر لی گئی۔
چکری ٹول پلازہ راولپنڈی کے قریب سے 27 کلو چرس اور 26 کلو گرام ممنوعہ مواد برآمد کر لیا گیا۔ ایم ون موٹروے اسلام آباد سے دو مختلف کارروائیوں میں دو ملزمان سے 6 کلو گرام چرس برآمد کر لی گئی۔ واضح رہے کہ گرفتار ملزمان کے خلاف انسداد منشیات ایکٹ کے تحت الگ الگ مقدمات درج کر لیے گئے ہیں جبکہ مزید تفتیش جاری ہے۔
