راولاکوٹ: کالعدم عوامی ایکشن کمیٹی کے پرتشدد حملوں میں شہید ہونے والے اہلکاروں کی نماز جنازہ سول لائنز راولاکوٹ میں سرکاری اعزاز کے ساتھ ادا کر دی گئی۔
نمازِ جنازہ میں چیف سیکرٹری آزاد کشمیر، آئی جی آزاد کشمیر پولیس، اعلیٰ سول و عسکری حکام، سماجی و سیاسی رہنماؤں اور شہریوں کی بڑی تعداد نے شرکت کی۔
شرکاء نے شہداء کی عظیم قربانیوں کو خراجِ عقیدت پیش کیا اور ان کے درجات کی بلندی کے لیے خصوصی دعائیں کیں۔
آئی جی آزاد کشمیر پولیس لیاقت علی ملک کا کہنا تھاکہ پرتشدد عناصر ذاتی مفاد کی خاطر معصوم لوگوں کو ورغلا کر امن و امان کی صورتحال خراب کرنے کی مذموم کوشش کی۔
ان کا کہنا تھا کہ پرتشدد حملوں میں آزادکشمیر پولیس کے 3 اہلکار شہید اور سیکیورٹی فورسز کے 42 اہلکار زخمی ہیں اس سے بڑھ کر دہشتگردی اور کیا ہو گی؟
آئی جی آزاد کشمیر نے مزید کہا کہ سیکیورٹی فورسز نے پیشہ ورانہ طرز عمل سے امن و امان کو برقرار رکھا اورشہریوں نے عوامی ایکشن کمیٹی کے احتجاج کو مسترد کیا۔
سیکیورٹی فورسز آزاد کشمیر میں شہریوں کے جان و مال کے تحفظ اور امن و امان کو یقینی بنانے کیلئے پر عزم ہیں، آئی جی آزاد کشمیر
ریاست کے امن، استحکام اور عوامی سلامتی کو چیلنج کرنے والے پرتشدد عناصر کے خلاف بلاامتیاز اور قانون کے مطابق مؤثر کارروائی جاری رکھی جائے گی
