لاہور: وزیراعلیٰ پنجاب مریم نواز شریف سے اوورسیز پاکستانیز فاؤنڈیشن (او پی ایف) کے وفد نے ملاقات کی.
ملاقات میں چیئرمین او پی ایف سید قمر رضا نے گرین انڈسٹریل اکنامک زون کے قیام پر تفصیلی بریفنگ دی۔
ملاقات میں او پی ایف اور گرین انرجی گروپ کے اشتراک سے پنجاب میں جدید گرین اکنامک زون قائم کرنے کی تجویز پیش کی گئی۔
تجویز پر وزیراعلیٰ مریم نواز شریف نے آمادگی کا اظہار کرتے ہوئے عملدرآمد کے لیے جامع ایکشن پلان طلب کر لیا۔
اس موقع پر وزیراعلیٰ نے مقامی اور غیر ملکی سرمایہ کاروں کے لیے خصوصی مراعاتی پیکج کا بھی اعلان کیا۔
بریفنگ میں بتایا گیا کہ گرین انڈسٹریل زون کے قیام سے 18 ہزار سے زائد افراد کو روزگار ملنے اور سالانہ 5.6 ارب روپے آمدن کی توقع ہے۔
گرین اکنامک زون میں سولر، ونڈ، ہائیڈرو، گراؤنڈ سورس انرجی، بیٹری اسٹوریج اور ایچ وی او بیک اپ سسٹمز قائم کیے جائیں گے۔
ماحول دوست مصنوعات کی برآمدات سے ملکی جی ڈی پی میں 1.5 فیصد تک اضافے اور علاقائی معیشت کو تقویت ملنے کی پیشگوئی بھی کی گئی۔
وزیراعلیٰ مریم نواز شریف نے کہا کہ پنجاب ہر قسم کی سرمایہ کاری کے لیے مکمل طور پر تیار ہے۔
انہوں نے کہا کہ صوبے میں تمام نئے کاروبار اور صنعتوں کے لیے "زیرو ٹائم ٹو سٹارٹ” پالیسی نافذ کی جا چکی ہے۔
سرمایہ کاروں کی سہولت کے لیے ون ونڈو آپریشن اور تمام این او سیز کی فوری فراہمی کا یکجا نظام موجود ہے۔
وزیراعلیٰ نے کہا کہ انتظامی و بیوروکریٹک رکاوٹوں سے پاک، محفوظ اور پرامن تجارتی ماحول فراہم کیا جا رہا ہے۔
انہوں نے اس عزم کا اظہار کیا کہ پنجاب کو جدید گرین انڈسٹری اور تجارتی سرگرمیوں کا عالمی مرکز بنایا جائے گا۔
