پی ایس ایل دلچسپ مرحلے میں داخل ہو گیا۔ ٹاپ 4 میں جگہ بنانے کی جنگ میں تیزی آنے لگی۔
پاکستان سپر لیگ کا 20واں میچ پنڈی کرکٹ اسٹیڈیم میں آج شام اسلام آباد یونائیٹڈ اور پشاور زلمی کے درمیان کھیلا جائے گا۔ پوائنٹس ٹیبل پر پشاور زلمی کی ٹیم تیسرے نمبر پر موجود ہے، اس نے اب تک 6میچز کھیلے ہیں جن میں سے 3میں فتح اور 2میں شکست کا سامنا کرنا پڑا ہے جبکہ ایک روز قبل اس کا پنڈی میں ہی شیڈول میچ بارش کی نذر ہوگیا تھا جس کی وجہ سے اس کے حصے میں ایک پوائنٹ آیا۔ جس کی وجہ سے اس کے مجموعی پوائنٹس کی تعداد 7ہوچکی ہے۔
دوسری جانب اسلام آباد یونائیٹڈ کو 6میں سے صرف 2میچز میں فتح حاصل ہوئی، 3میں شکست جبکہ ایک میچ بارش کی نذر ہونے کی وجہ سے اس کے پوائنٹس کی تعداد فقط 5اور وہ ٹیبل پر چوتھے نمبر پر موجود ہے۔پشاور زلمی کا انحصار ایک بار پھر اپنے کپتان بابراعظم پر ہوگا۔جن کا بیٹ خوب چل رہا اور وہ اپنی فارم سے ٹیم کو فتوحات دلانے کیلیے پراعتماد ہیں۔اسی طرح صائم ایوب کے نوجوان کندھوں پر بھی توقعات کا بوجھ موجود ہوگا۔بولرز میں سلمان ارشاد اور عارف یعقوب سے عمدہ کارکردگی کی توقع ہے۔ادھر اسلام آباد یونائیٹڈ کی توقعات بدستور اپنے ہارڈ ہٹرز سے ہی وابستہ ہیں، کولن منرو، شاداب خان اور نسیم شاہ توجہ کا مرکز ہوں گے۔
