وزیراعظم شہباز شریف نے گلگت بلتستان کے علاقے غذر میں گلیشئیئرز پھٹنے کی قبل از وقت اطلاع دیکر سیکڑوں افراد کی جانیں بچانے والے وصیت خان کو خراج تحسین پیش کیا، وزیراعظم نے کہا کہ وصیت خان نےگاؤں کے رہائشیوں کو گلوف کے حوالے سے بروقت آگاہ کرکے جانی نقصان سے بچایا ۔
وزیراعظم شہبازشریف نے گکلیشیئرز پھٹنے کی قبل از وقت اطلاع دینے پر گلگت بلتستان کے علاقے غذر کے رہائشی وصیت خان کو خراج تحسین پیش کیا اورکہا کہ وصیت خان نےگاؤں کے رہائشیوں کو گلوف کے حوالے سے بروقت آگاہ کرکے جانی نقصان سے بچایا ۔
وصیت خان کی اطلاع کے بعد راتوں رات گاؤں تالی داس میں 100مکانات خالی کرائےگئے اور تقریباً 200 لوگ بلند پہاڑی مقام پر پہنچے، تاہم جب سیلاب آیا تو ان خالی مکانات کو نقصان بھی پہنچا لیکن قیمتی جانیں بچ گئیں۔ ڈی آئی جی پولیس کی جانب سے وصیت خان کیلئے 10ہزار روپےانعام کا اعلان کیا گیا تھا ۔
دوسری جانب وزیراعظم شہبازشریف نے سیلابی صورتحال کے پیش نظر رہائشیوں کو محفوظ مقامات پر منتقل کرنے پر ریسکیو ٹیموں کی پذیرائی کی ۔
انہوں نے این ڈی ایم اے، ضلعی انتظامیہ کو غذر کے متاثرہ علاقوں میں ریسکیو آپریشن جاری رکھنے اور متاثرہ علاقوں میں امدادی سرگرمیاں تیز کرنے کی ہدایت کی ۔
وزیراعظم نے سیلابی صورتحال کے پیش نظر ملک کے زیریں علاقوں میں امدادی کاروائیوں کی تیاریاں رکھنے کی ہدایت کی اور کہا کہ دریاؤں، ندی نالوں، پانی کی قدرتی گزرگاہوں کے گرد تعمیرات کو روکنے کیلئےقومی سطح پر مہم چلائیں گے ۔
شہبازشریف نے کہا کہ حالیہ بارشوں اور وسیلاب سے متاثرہ لوگوں کی مدد قومی فریضہ ہے، متاثرین کے ریسکیو اور امداد کے بعد بحالی کا کام شروع کیا جائے گا۔ وزیراعظم نے ہدایت کی کہ متاثرین تک امدادی سامان کی فراہمی کو ہر حال میں یقینی بنایا جائے ۔
