نیویارک: پاکستان نے اقوام متحدہ کی سلامتی کونسل میں مسئلہ کشمیر کو بھرپور انداز میں اجاگر کیا اور عالمی برادری پر زور دیا کہ پائیدار امن کے لیے تنازعات کی بنیادی وجوہات کو حل کیا جائے۔
اقوام متحدہ مشن کے جاری کردہ اعلامیے کے مطابق، پاکستان نے سلامتی کونسل میں مسئلہ کشمیر کو مؤثر طریقے سے اٹھایا اور عالمی قیادت کو تنازع کے منصفانہ حل کے لیے کردار ادا کرنے پر زور دیا۔
مسئلہ کشمیر سلامتی کونسل کے ایجنڈے پر موجود ہے: طارق فاطمی
وزیراعظم کے معاون خصوصی طارق فاطمی نے سلامتی کونسل کی کھلی بحث سے خطاب کرتے ہوئے کہا کہ مسئلہ جموں و کشمیر تاحال سلامتی کونسل کے ایجنڈے پر موجود ہے اور اس کا منصفانہ اور حتمی حل ابھی باقی ہے۔
انہوں نے کہا کہ عالمی برادری نے کشمیری عوام سے ان کے حق خودارادیت کے لیے استصوابِ رائے کا وعدہ کیا تھا، جسے پورا کرنا سلامتی کونسل کی بنیادی ذمہ داری ہے۔
طارق فاطمی نے اس موقع پر عالمی قیادت پر زور دیا کہ وہ اپنی قراردادوں پر عمل درآمد یقینی بنائے تاکہ تنازع کا منصفانہ اور دیرپا حل ممکن ہو سکے۔
پاکستان عالمی امن کے قیام میں اہم کردار ادا کر رہا ہے
انہوں نے اجلاس کے شرکاء کو آگاہ کیا کہ پاکستان ان ممالک میں شامل ہے جو سب سے طویل عرصے سے اقوام متحدہ کے تحت امن مشنز میں خدمات انجام دے رہے ہیں۔ پاکستان اقوام متحدہ کے قیام امن کمیشن کا بانی رکن بھی ہے۔
181 پاکستانی اہلکار عالمی امن کے لیے جانیں نچھاور کر چکے ہیں
طارق فاطمی نے بتایا کہ پاکستان نے اب تک 48 اقوام متحدہ مشنز میں 2 لاکھ 35 ہزار سے زائد امن اہلکار تعینات کیے ہیں، جن میں سے 181 پاکستانی اہلکار عالمی امن و سلامتی کے لیے اپنی جانوں کا نذرانہ پیش کر چکے ہیں۔
ان کے مطابق اس وقت بھی 3 ہزار 267 سے زائد پاکستانی مرد و خواتین 7 مختلف اقوام متحدہ امن مشنز میں خدمات سرانجام دے رہے ہیں۔
