ایشیاکپ ٹی ٹوئنٹی ٹورنامنٹ میں قومی ٹیم کا شاندار آغاز، پاکستان نے ایونٹ کے چوتھے میچ میں عمان کو 93 رنز سے ہرادیا ،پاکستان کے 161 رنز ہدف کے تعاقب میں عمان کی پوری ٹیم صرف 67رنز پرڈھیر ہوگئی، شاندار 66 رنز سکور کرنے پر محمد حارث میچ کے بہترین کھلاڑی قرار پائے ۔
دبئی میں کھیلے گئے ایشیا کپ ٹی ٹوینٹی ٹورنامنٹ کے گروپ اے کے میچ میں پاکستان کے کپتان سلمان علی آغا نے عمان کےخلاف ٹاس جیت کر پہلے بیٹنگ کا فیصلہ کیا ۔
قومی ٹیم نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 160 رنز بنائے،محمد حارث نے 66 رنز کی اننگز کھیلی ۔
صاحبزادہ فرحان نے 29 رنز بنائے جبکہ فخر زمان نے 23 رنز کیساتھ ناٹ آؤٹ رہے،صائم ایوب اور کپتان سلمان علی آغا صفر پر آؤٹ ہوئے، محمد نواز نے 19 اور حسن نواز نے 9 رنز بناکر آوٹ ہوئے ۔
عمان کی جانب سے عامر کلیم اور شاہ فیصل نے 3،3 جبکہ محمد ندیم نے ایک کھلاڑیوں کو آؤٹ کیا ۔
مقررہ ہدف کے تعاقب میں عمان کی پوری ٹیم 17 ویں اوور میں صرف 67 رنز پر ڈھیر ہوگئی ، پاکستان کی جانب سے صائم ایوب، سفیان مقیم ، فہیم اشرف نے 2،2 جبکہ شاہین شاہ آفریدی ، ابرار احمد اور محمد نواز نے ایک ایک وکٹ حاصل کی ۔
عمان کی جانب سے سب سے زیادہ حماد مرزا نے 27، عامر کلیم 13 اور شکیل احمد نے 10 رنز کی اننگز کھیلی ، باقی کوئی بھی کھلاڑی ڈبل فِگر میں داخل نہ ہو سکا ۔
پاکستان کے جارحانہ بیٹر محمد حارث کو شاندار 66 رنز سکور کرنے پر میچ کے بہترین کھلاڑی کا اعزا دیا گیا، ایونٹ میں پاکستان اپنا دوسرا میچ اتوار کو روایتی حریف بھارت کے خلاف کھیلا جائے گا ۔
