لندن: پاکستان ہائی کمیشن لندن میں پاکستان انویسٹمنٹ راؤنڈ ٹیبل کا انعقاد کیا گیا.
راؤنڈ ٹیبل میں لندن کے معروف سرمایہ کاروں اور عالمی مالیاتی اداروں نے شرکت کی۔
وزیر خزانہ و محصولات سینیٹر محمد اورنگزیب نے بطور مہمان خصوصی شرکت کی۔
اس موقع پر گورنر اسٹیٹ بینک جمیل احمد، مشیر خزانہ خرم شہزاد اور برطانیہ میں پاکستانی ہائی کمشنر ٹیپو عثمان بھی موجود تھے۔
اپنے خطاب میں وزیر خزانہ نے کہا کہ حکومت پاکستان میکرو اکنامک استحکام کے لیے پرعزم ہے اور پائیدار ترقی کے لیے بھرپور کوششیں جاری ہیں.
سٹرکچرل ریفارمز ایجنڈے پر عملدرآمد جاری ہے جس کا مقصد نجی شعبے کو فعال بنانا ہے۔
انہوں نے کہا کہ مالیاتی استحکام کے ثمرات پرائمری سرپلس، خسارے میں کمی، ریونیو میں اضافے اور ادارہ جاتی و مالیاتی اصلاحات کی صورت میں سامنے آ رہے ہیں۔
وزیر خزانہ نے بتایا کہ حکومت نے نجکاری کے علاوہ سرکاری اداروں میں اصلاحات کا آغاز کیا ہے.
توانائی کے شعبے میں اصلاحات، مالیاتی شفافیت اور کاروبار میں آسانی حکومت کے معاشی استحکام کے وژن کو مزید مضبوط کریں گی۔
انہوں نے کہا کہ معاشی ترقی کے لیے ٹیکس بیس میں توسیع اور نفاذ ضروری ہے.
ٹیکس حکام کے صوابدیدی اختیارات ختم کر دیے گئے ہیں اور ٹیکسیشن میں کوئی ترجیحی سلوک نہیں برتا جا رہا.
انہوں نے کہا کہ پاکستان کاروبار کے لیے کھلا ہے اور بین الاقوامی سرمایہ کاروں کی دلچسپی میں اضافہ ہو رہا ہے.
پاکستان نے آئی ایم ایف کے تمام جائزے شیڈول کے مطابق کامیابی سے مکمل کیے ہیں جس کی توثیق تین ریٹنگ اپ گریڈز سے ہوئی ہے۔
