قومی ٹیم نے ٹی ٹوینٹی سیریز کے دوسرے میچ میں بنگلادیش کو 57 رنز سے ہراکر سیریز میں 2 صفر کی فیصلہ کن برتری حاصل کرلی، پاکستان کے 202 رنز ہدف کے تعاقب میں مہمان ٹیم 19 اوورز میں 144رنز پر آوٹ ہو گئی ۔
لاہور: (کے ٹو ٹائمز) قذافی سٹیڈیم لاہور میں کھیلے گئے میچ میں پاکستان نے ٹاس جیت کر بیٹنگ کا فیصلہ کیا اور مقررہ اوورز میں 6 وکٹوں کے نقصان پر 201 رنز بنائے ۔
صاحبزادہ فرحان 74 رنز بناکر نمایاں بیٹر رہے،حسن نواز 51 ،محمد حارث 41 اور کپتان سلمان علی آغا 19 رنز بناکر آوٹ ہوئے ،بنگلادیش کی جانب سے حسن محمود اور تنظیم حسن نے 2،2 جبکہ راشد حسین نے ایک کھلاڑی کو آوٹ کیا ۔
مقررہ ہدف کے تعاقب میں بنگلادیشی کی ٹیم 19 اوورز میں 144 رنز پر ڈھیر ہوگئی، تنظیم حسن ثاقب 51، تنزید حسین 33 اور مہدی حسن مرزا 19 رنز بناکر نمایاں بلے باز رہے ۔
پاکستان کی جانب سے ابرار احمد نے 3، فہیم اشرف، حارث روف، شاداب خان، خوشدل شاہ اور صائم ایوب نے ایک، ایک وکٹ اپنے نام کی ۔
دوسرا ٹی ٹوینٹی میچ جیتنے کے بعد قومی ٹیم نے تین میچز کی سیریز میں دو صفر کی فیصلہ کن برتری حاصل کرلی،شاندار 74 رنز کی اننگز کھیلنے پر صاحبزادہ فرحان کو میچ کے بہترین کھلاڑی کا اعزاز دیا گیا، تیسرا اور آخری ٹی ٹوینٹی میچ یکم جون اتوار کو کھیلا جائے گا ۔
