گلگت بلتستان میں ممکنہ سیلابی صورتحال کے پیش نظر تمام متعلقہ اداروں اور محکموں کو الرٹ رہنے کے احکامات جاری کردیئے گئے ، وزیراعلیٰ گلگت بلتستان گلبر خان نے ممکنہ سیلاب کی صورت میں تمام اقدامات اٹھانے کی ہدایات بھی کردیں ۔
وزیر اعلیٰ گلگت بلتستان حاجی گلبر خان نے گرمی کی شدت میں اضافے کی وجہ سے گلیشیرز پگھلنے کے نتیجے میں مختلف علاقوں میں سیلاب اور دریاؤں کی سطح میں اضافے کی وجہ سے درپیش سیلابی صورتحال کے پیش نظر احکامات جاری کئے ۔
اپنے ایک بیان میں حاجی گلبر خان نے گلگت بلتستان ڈیزاسٹرمینجمنٹ اتھارٹی (GBDMA)، ضلعی انتظامیہ سمیت تمام متعلقہ محکموں کو الرٹ رہنے کے احکامات دیئے ہیں ۔
وزیر اعلیٰ گلگت بلتستان نے تمام اضلاع کے ڈپٹی کمشنرز اور متعلقہ آفیسران کو سیلابی صورتحال اور دریاؤں کے پانی کی سطح میں اضافے کی وجہ سے ہونے والے نقصانات سے بچاؤ کیلئے بروقت اقدامات کرنے کے احکامات دیئے ہیں ۔
وزیر اعلیٰ نے کہا کہ متعلقہ محکمے کسی بھی ہنگامی صورتحال میں بروقت ریسکیو اور بحالی کے عمل کو شروع کرنے کیلئے تمام وسائل بروئے کار لائیں ۔
