نیشنل الیکٹرک پاور ریگولیٹری اتھارٹی (نیپرا) نے ہفتہ کو سہ ماہی فیول لاگت ایڈجسٹمنٹ کی مد میں بجلی کی قیمت میں 3 روپے 76 پیسے فی یونٹ اضافے کی منظوری دے دی۔
یہ رقم تین ماہ جون، جولائی اور اگست میں بجلی کے بلوں میں وصول کی جائے گی۔ حکومت جون میں 1.90 روپے فی یونٹ وصول کرے گی جبکہ جولائی اور اگست میں فی یونٹ 93 پیسے وصول کیے جائیں گے۔رپورٹس میں کہا گیا ہے کہ بجلی کے نرخوں میں اضافہ تیسری سہ ماہی ایڈجسٹمنٹ کے پیش نظر کیا گیا ہے۔
ایک روز قبل پاکستان میں پیٹرول کی قیمت میں 4 روپے 74 پیسے فی لیٹر اور ڈیزل کی قیمت میں 3 روپے 80 پیسے فی لیٹر کمی کی گئی تھی۔عالمی سطح پر تیل کی قیمتوں میں کمی کے درمیان وفاقی حکومت نے مسلسل تیسرے پندرہ روزہ جائزے کے لیے پیٹرول کی قیمت میں کمی کردی۔ پیٹرول کی نئی قیمت 273.10 روپے سے کم ہوکر 268.36 روپے فی لیٹر ہے۔ہائی اسپیڈ ڈیزل کی قیمت میں 3.86 روپے فی لیٹر کی کمی کی گئی ہے، جس سے یہ گزشتہ 274.08 روپے فی لیٹر سے 270.22 روپے فی لیٹر ہو گئی ہے۔
