وفاقی وزیر داخلہ محسن نقوی نے منگل کو اسلام آباد کے شہریوں کی سہولت کے لیے پانچ بڑے منصوبوں کا اعلان کیا۔
محسن نقوی نے کیپیٹل ڈسٹرکٹ اتھارٹی (سی ڈی اے) ہیڈ کوارٹرز کا دورہ کیا اور شہریوں کو ریلیف فراہم کرنے کے لیے اہم فیصلے لیے۔ اس موقع پر وزیر داخلہ نے اسلام آباد میں کیپٹل ایمرجنسی سروسز اور کیپٹل ویسٹ مینجمنٹ کمپنی شروع کرنے کا فیصلہ کیا۔ کیپیٹل سیف سٹی اتھارٹی، سینٹرل بزنس ڈسٹرکٹ (سی بی ڈی) اسلام آباد اور کیپٹل واٹر اینڈ سینی ٹیشن ایجنسی (واسا) بھی قائم کی جائیں گی۔
وفاقی وزیر داخلہ نے چیئرمین سی ڈی اے اور چیف کمشنر اسلام آباد محمد علی رندھاوا کو ٹاسک سونپ دیا۔ محسن نقوی نے کہا؛ "تمام اقدامات کا مقصد اسلام آباد کے شہریوں کو بہترین اور تیز ترین خدمات فراہم کرنا ہے، جلد ہی ہم اسلام آباد کو ایک مثالی شہر بنائیں گے”۔
وزیر داخلہ نے سی ڈی اے ہیڈ کوارٹرز کے دورے کے دوران ایمبولینس 1122 اور فائر بریگیڈ کے عملے سے ملاقات کی اور انہیں اپنے فرائض تندہی سے ادا کرنے کی تاکید کرتے ہوئے کہا کہ ایمبولینس، فائر بریگیڈ اور واٹر ریسکیو سروس کو کیپیٹل ایمرجنسی سروسز کے تحت مربوط کیا جائے۔
انہوں نے کہا کہ شہری کسی بھی ہنگامی صورتحال میں 1122 پر کال کر کے ایمرجنسی سروسز حاصل کر سکیں گے۔ یونیفائیڈ ایمرجنسی کنٹرول روم قائم کیا جائے گا، جی پی ایس کے ذریعے گاڑیوں کی لائیو ٹریکنگ کی جائے گی اور عملے کی تربیت پر خصوصی توجہ دی جائے گی۔
وزیر داخلہ نے شہر میں نئے ایمرجنسی سروسز 1122 اسٹیشنز بنانے کی بھی ہدایت کی اور منظور شدہ آسامیوں پر میرٹ پر بھرتی کا حکم دیتے ہوئے کہا کہ اسلام آباد میں ایمبولینسز کی تعداد میں اضافہ کیا جائے گا۔ اس موقع پر چیئرمین سی ڈی اے و چیف کمشنر اسلام آباد محمد علی رندھاوا، ڈپٹی کمشنر اسلام آباد عرفان میمن اور ایمرجنسی سروسز کے دیگر حکام بھی موجود تھے۔
