لاہور: وزیراعلیٰ پنجاب مریم نواز شریف نے مائیکرو، سمال اینڈ میڈیم سائزڈ انٹرپرائزز کے عالمی دن پر اپنے پیغام میں کہا ہے کہ اس دن کا مقصد چھوٹے اور درمیانے درجے کے کاروبار پر حکومت کی توجہ مرکوز کرنا ہے۔
وزیراعلیٰ مریم نواز نے کہا کہ پنجاب میں چھوٹے اور درمیانے درجے کے کاروبار میں بے پناہ مواقع موجود ہیں۔
ایس ایم ایز کے تاجروں کو عالمی منڈیوں تک رسائی کے لیے ہر ممکن مدد فراہم کریں گے۔
انہوں نے کہا کہ پنجاب حکومت آسان کاروبار فنانس اور آسان کاروبار کارڈ کے ذریعے ایس ایم ایز کو سہارا دے رہی ہے۔
آسان کاروبار اسکیم کے ذریعے ٹرانسپورٹ سیکٹر اور ہول سیل کے کاروبار کے رجحان میں اضافہ ہو رہا ہے۔
وزیراعلیٰ مریم نواز نے کہا کہ پنجاب حکومت لائیو اسٹاک، زراعت، دستکاری اور گارمنٹس سمیت ہر شعبے میں ایس ایم ایز کی حوصلہ افزائی کر رہی ہے۔
انٹرپرینیورشپ کلچر کے فروغ کے لیے سازگار ماحول پنجاب حکومت کی ترجیحات میں شامل ہے۔ بجٹ میں ٹیکس نہ بڑھا کر ایس ایم ایز کو بہت فائدہ دے رہے ہیں۔
وزیراعلیٰ پنجاب نے کہا کہ صوبے میں امن و امان کی صورتحال سازگار ہے اور کاروباری سرگرمیوں میں اضافہ ہو رہا ہے۔
حکومت چھوٹی صنعتوں کو درپیش چیلنجز پر قابو پانے اور ہر ممکن وسائل مہیا کر رہی ہے۔
