میانوالی میں جلسے سے خطاب کرتے ہوئے وزیراعلیٰ پنجاب مریم نواز نے کہا کہ وہ دن چلے گئے جب لوگ میانوالی سے ووٹ لے کر چلے جاتے تھے. جو لوگ کہتے تھے کہ (ن) لیگ کے دور میں صرف لاہور میں ترقی ہوئی وہ میانوالی کو دیکھ لیں۔ میانوالی نے 4 سال پنجاب اور پاکستان پر حکومت کی لیکن یہاں ترقی نہ آسکی۔
وزیراعلیٰ نے کہا کہ گرین بس اور میڈیکل ہسپتال سمیت جو سہولیات لاہور میں ہیں وہ ہی میانوالی کو بھی دی ہے، دعوؤں پر نہیں عملی اقدامات پر یقین رکھتی ہوں، اللہ تعالی نے تین سال اور دیے تو پنجاب کی قسمت بدل جائے گی، میانوالی اب محروم نہیں رہے گا لہٰذا میانوالی والو اب کی بار کسی فراڈ کو ووٹ مت دینا۔
مریم نواز نے میانوالی میں کالج آف الائیڈ پرفیشنلز، زرعی اور لا کالج بنانے کا اعلان بھی کیا۔
وزیر اعلیٰ نے کہا کہ عوام کا غیر متزلزل اعتماد ہی کسی بھی جمہوری قیادت کا اصل اثاثہ ہوتا ہے۔ میانوالی میں آج کے اس فقید المثال اجتماع نے واضح کر دیا ہے کہ عوام کی امیدیں اور ملک کی تعمیر و ترقی کا سفر کس رخ پر گامزن ہے۔
