مظفرآباد سمیت آزاد کشمیر کے مختلف شہروں میں مون سون کی بارشوں کا سلسلہ وقفے وقفے سے جاری ہے ، بارشوں کے باعث لینڈ سلائیڈنگ سے کئی رابطہ سڑکیں بند اور کئی مکانات تباہ ہوگئے ۔
مظفرآباد: بارش کے باعث لینڈ سلائیڈنگ سے کئی رابطہ سڑکیں بند ہوگئیں، ٹامی برساتی نالہ میں طغیانی سے کئی مکانات تباہ ہوگئے ،ملبے تلے دب کر ایک بچہ جاں بحق ہوگیا ۔
لینڈ سلائیڈنگ سے طارق آباد بائی پاس جبکہ خیبرپختونخوا کو آزادکشمیر سے ملانے والی سڑک لوہار گلی کے مقام سے بند ہوگئی ۔
برساتی نالے میں پانی آنے کی وجہ سے متعدد مکانات کو شدید نقصان پہنچا، پانی کے ساتھ نالے میں بڑی مقدار میں مٹی آنے سے متعدد گھر مٹی میں ڈوب گئے ۔
ادھر کوٹلی کے قریب بہنے والے دریائے پونچھ اور ندی نالوں میں پانی کی سطح مسلسل بلند ہونے لگی ہے۔
ڈسٹرکٹ ڈیزاسٹر منیجمنٹ اتھارٹی کے مطابق گلپور ڈیم سے 3 سپل ویز کھول دیے گئے ہیں اور شہریوں کو ہدایت کی گئی ہے کہ وہ دریاوں اور ندی نالوں سے دور رہیں ۔
