عیدالاضحیٰ کے موقع پر مانسہرہ اور وادی کاغان کے سیاحتی مقامات پر لاکھوں سیاحوں کی آمد کے باعث غیر معمولی رش دیکھنے میں آیا ہے، جس کے نتیجے میں ضلعی انتظامیہ کا ٹریفک پلان بری طرح ناکام ہو گیا۔
سرکاری اعداد و شمار کے مطابق عید کے ابتدائی دنوں میں 74 ہزار سے زائد گاڑیاں وادی کاغان میں داخل ہوئیں۔ آج عید کے چوتھے روز بھی صورتحال بہتر نہ ہو سکی اور وادی میں سیاحوں کی بڑی تعداد موجود ہے۔ تمام ہوٹلز مکمل طور پر بھر چکے ہیں جبکہ مانسہرہ سے بابو سر ٹاپ تک مختلف مقامات پر شدید ٹریفک جام کی صورتحال برقرار ہے۔
مانسہرہ شاطے انٹرچینج سے ناراں شاہراہ تک ٹریفک کا دباؤ انتہائی بڑھ گیا ہے۔ شاطے انٹرچینج سے بکریال سٹی تک سڑک کی خراب حالت کے باعث گاڑیوں کی لمبی قطاریں لگ گئیں، جس سے سیاحوں کو شدید مشکلات کا سامنا کرنا پڑ رہا ہے۔
سیاحوں اور مقامی ذرائع کے مطابق انتظامیہ کی ناقص حکمت عملی اور ٹریفک کنٹرول کے مؤثر انتظامات نہ ہونے کی وجہ سے صورتحال مزید خراب ہوئی ہے، جس کے باعث ہزاروں سیاح گھنٹوں سڑکوں پر پھنسے رہے۔
