مانسہرہ میں جاری طوفانی بارشوں اور سیلابی ریلوں کا سلسلہ تھم گیا ہے۔جس کے بعد سے کاغان میں پھنسے ہوئے ہزاروں سیاحوں کے انخلاء کا سلسلہ جاری ہے۔
ڈپٹی کمشنر مانسہرہ کے مطابق مانسہرہ میں مہانڈری کے مقام سے پل بہہ جانے کی وجہ سے شاہراہ کاغان ابھی تک بند ہے، پل بہہ جانے کی وجہ سے پھنسے ہوئے سیاحوں کو روانہ کیا جا رہا ہے۔ڈپٹی کمشنر کے مطابق 400 سے زائد گاڑیوں کے قافلوں کو پولیس کی حفاظت میں بابوسرٹاپ سے لے کر چلاس کے راستے روانہ کیا گیا ہے،ڈھائی ہزار کے قریب سیاح کاغان ناران میں موجود ہیں جبکہ اس کے برعکس نئے سیاحوں کو وادی کاغان کی جانب آنے پر مکمل طور ہر پابندی عائد کی گئی ہے۔
ان کے مطابق نئے پل کی تعمیر کے بعد سے وادی کاغان کو سیاحوں کے لیے کھول دیا جائے گا،جبکہ وادی کاغان میں کھانے پینےکی اشیاء وافر مقدار میں موجود ہیں،اس کے ساتھ ہی 24گھنٹوں میں متبادل راستے کا انتظام بھی کیا جائے گا۔یاد رہے گزشتہ روز طوفانی بارشوں اور سیلابی ریلوں کی وجہ سے مانسہرہ میں مکانات، باغات،اور مساجد سمیت فصلوں کو شدید ترین نقصان پہنچا تھا جبکہ مہانڈری کے مقام پر پل بھی بہہ گیا تھا۔
