اسلام آباد کے علاقے لوہی بھیر میں واقع سی بی آر ٹاؤن فیز ون کے مکین آوارہ کتوں کی بڑھتی ہوئی تعداد سے شدید پریشانی کا شکار ہیں۔ خصوصاً رمضان المبارک کے دوران تراویح کے لیے مساجد جانے والے شہریوں کو مشکلات کا سامنا کرنا پڑ رہا ہے۔
علاقہ مکینوں کے مطابق رات کے وقت آوارہ کتوں کے جھنڈ گلیوں اور سڑکوں پر گھومتے نظر آتے ہیں، جس کے باعث خواتین، بزرگوں اور بچوں میں خوف و ہراس پایا جاتا ہے۔ گزشتہ روز ایک کمسن بچے کو آوارہ کتے نے کاٹ لیا، جس کے بعد علاقے میں تشویش کی لہر دوڑ گئی۔ بچے کو فوری طور پر قریبی اسپتال منتقل کیا گیا جہاں اسے طبی امداد فراہم کی گئی۔
مکینوں کا کہنا ہے کہ انہوں نے متعدد بار متعلقہ حکام کو شکایات درج کروائیں، تاہم اب تک کوئی مؤثر اقدام نہیں کیا گیا۔ شہریوں نے ضلعی انتظامیہ سے مطالبہ کیا ہے کہ فوری طور پر آوارہ کتوں کی تلفی یا محفوظ منتقلی کے لیے اقدامات کیے جائیں تاکہ کسی بڑے سانحے سے بچا جا سکے۔
علاقہ مکینوں نے خبردار کیا ہے کہ اگر مسئلے کا فوری حل نہ نکالا گیا تو وہ احتجاج پر مجبور ہوں گے۔ عوامی حلقوں نے انتظامیہ سے اپیل کی ہے کہ شہریوں کے جان و مال کے تحفظ کو یقینی بنایا جائے اور لوہی بھیر سمیت ملحقہ آبادیوں میں آوارہ کتوں کے خلاف خصوصی مہم چلائی جائے۔
