فیض حمید فوجی تحویل میں،ان کے خلاف فیلڈ جنرل کورٹ مارشل کا عمل شروع ہوگیا ہے۔
آئی ایس پی آر کے جاری کردہ بیان کے مطابق سابق ڈی جی آئی ایس آئی لیفٹیننٹ جنرل ریٹائرڈ فیض حمید کو فوجی تحویل میں لے لیا گیاہے اور اس کے ساتھ ہی فیلڈ کورٹ مارشل کا عمل بھی شروع کر دیا گیاہے ۔
آئی ایس پی آر کی طرف سے جاری کر دہ پریس ریلیز کے مطابق سپریم کورٹ آف پاکستان کے احکامات کی تعمیل کی گئی ہے جس پر پاکستان آرمی کی طرف سے ٹاپ سٹی کیس میں لیفٹیننٹ جنرل (ر) فیض حمید کے خلاف کی جانے والی شکایات کی درستگی کو جانچنے کے لیے ایک تفصیلی انکوائری کی گئی۔ اس انکوائری کے مطابق لیفٹیننٹ جنرل (ر) فیض حمید کے خلاف پاکستان آرمی ایکٹ کے تحت مناسب تادیبی کارروائی کا آغاز کردیا گیا ہے۔
اس کے ساتھ ہی ریٹائرمنٹ کے بعد بھی پاکستان آرمی ایکٹ کی متعدد خلاف ورزیوں کے شواہد بھی ملے ہیں۔جس کی وجہ سے فیلڈ جنرل کورٹ مارشل کا عمل شروع کیا گیا ہے اور اس کے ساتھ ہی لیفٹیننٹ جنرل (ر) فیض حمید کو فوجی حراست میں لے لیا گیا ہے۔
