لکی مروت میں محمد غزنی خیل سے تعلق رکھنے والے نوجوان آیان اور دیگر لاپتا افراد کے مبینہ اغوا کے خلاف جاری احتجاج ضلعی انتظامیہ اور پولیس افسران کے ساتھ کامیاب مذاکرات کے بعد ختم کر دیا گیا۔
پولیس کے مطابق مظاہرین نے منجیوالا چوک کے مقام پر انڈس ہائی وے بند کر رکھی تھی جس کے باعث ٹریفک کی روانی بری طرح متاثر ہوئی۔ مذاکرات کے بعد مظاہرین نے احتجاج ختم کرنے پر رضامندی ظاہر کی اور سڑک کو ہر قسم کی ٹریفک کے لیے کھول دیا گیا۔
احتجاج کے دوران اس وقت صورتحال مزید سنگین ہوگئی جب علاقے سے لاپتا مزید تین نوجوانوں کے ورثاء بھی احتجاج میں شامل ہوگئے۔ ورثاء نے الزام عائد کیا کہ ان کے بچوں کو نامعلوم افراد گاڑیوں میں ڈال کر لے گئے، تاہم کسی بھی ادارے نے ذمہ داری قبول نہیں کی۔
ورثاء کا کہنا تھا کہ انہیں خدشہ ہے کہ لاپتا نوجوانوں کو نقصان پہنچایا جا سکتا ہے۔ مظاہرین نے مطالبہ کیا کہ جب تک چاروں نوجوان بازیاب نہیں ہوتے احتجاج جاری رہے گا، تاہم بعد ازاں مذاکرات کے بعد احتجاج ختم کر دیا گیا۔
