خیبر پختونخوا میں ڈینگی وائرس کے کیسز میں مسلسل اضافہ دیکھنے میں آ رہا ہے، جہاں رواں سال رپورٹ ہونے والے مجموعی کیسز کی تعداد 250 تک پہنچ گئی ہے۔ تاہم محکمۂ صحت کے مطابق اب تک ڈینگی سے کسی ہلاکت کی اطلاع موصول نہیں ہوئی۔
محکمۂ صحت کے اعداد و شمار کے مطابق پشاور ڈینگی سے سب سے زیادہ متاثرہ ضلع رہا، جہاں رواں سال اب تک 134 کیسز کی تصدیق کی جا چکی ہے۔
حکام کا کہنا ہے کہ گزشتہ ایک ہفتے کے دوران صوبے بھر میں ڈینگی کے مزید 35 کیسز رپورٹ ہوئے، جس کے بعد انسدادِ ڈینگی سرگرمیوں میں مزید تیزی لائی گئی ہے۔
محکمۂ صحت کے مطابق انسدادِ ڈینگی مہم کے دوران مختلف اضلاع میں گھروں، پانی کے کنٹینرز اور دیگر ممکنہ افزائشی مقامات کا معائنہ کیا گیا، جبکہ 1,488 مقامات پر پانی میں موجود ڈینگی مچھر کے لاروا کو تلف کیا گیا۔
محکمۂ صحت نے شہریوں سے اپیل کی ہے کہ گھروں اور اردگرد پانی جمع نہ ہونے دیں، پانی کے برتن ڈھانپ کر رکھیں اور ڈینگی سے بچاؤ کے لیے احتیاطی تدابیر پر سختی سے عمل کریں۔
