پاک فوج کے شعبہ تعلقات عامہ سے جاری بیان میں کہا گیا ہے کہ خیبرپختونخوا کے مختلف علاقوں میں سکیورٹی فورسز نے کارروائیاں کی ہیں جس کے دوران 19 دہشت گرد ہلاک ہوگئے ہیں جبکہ فائرنگ کے تبادلے میں پاک فوج کے 3 جوان شہید ہو چکے ہیں ، 6 اور 7 جنوری کو تین الگ الگ آپریشنز میں 19 دہشت گردوں کو ہلاک کیا گیا ہے ۔
آئی ایس پی آر کے مطابق دہشت گردوں کی موجودگی کی خفیہ اطلاع پرسکیورٹی فورسز کی جانب سے پشاور کے علاقے متنی میں آپریشن کیا گیا اور اس دوران سکیورٹی فورسزنے دہشت گردوں کے ٹھکانے کو مؤثر طریقے سے نشانہ بنایا ، کارروائی میں 8 دہشت گرد ہلا ہو گئے ۔
آئی ایس پی آر نے کہا ہے کہ دوسری کارروائی ضلع مہمند کے علاقے بائیزئی میں کی گئی اور اس کارروائی میں بھی 8 دہشت گردوں کو ہلاک کیا گیا ،تیسری کارروائی کرک میں کی گئی جہاں دہشت گردوں کے مقام کو مؤثر انداز سے نشانہ بنایا گیا اور فائرنگ کے نتیجے میں 3 دہشت گرد ہلاک ہوئے ۔
آئی ایس پی آر نے مزید کہا ہے کہ دہشت گردوں کے ساتھ شدید فائرنگ کے تبادلے کے دوران تین بہادر بیٹے شہید ہو گئے ہیں ،شہید ہونے والوں میں لانس حوالدار عباس علی، نائیک محمد نذیر، نائید محمد عثمان شامل ہیں ۔
آئی ایس پی آر نے بتایا کہ علاقے میں پائے جانے والے دہشت گردوں کو ختم کرنے کے لیے کارروائیاں کی جا رہی ہیں ،پاکستان کی سکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں ۔
