کل جماعتی حریت کانفرنس آزاد جموں و کشمیر نے جموں و کشمیر لبریشن سیل کے اشتراک سے اسلام آباد میں بھارتی ہائی کمیشن کے سامنے بھارت کے یوم جمہوریہ کو یوم سیاہ کے طور پر منانے کے لیے احتجاجی ریلی نکالی۔
احتجاجی مظاہرے کی قیادت کنوینئر اے پی ایچ سی محمود احمد ساغر نے کی،مظاہرے میں کل جماعتی حریت کانفرنس آزا د جموں کشمیر کے رہنماوں کے علاوہ آزاد کشمیر کی مختلف سیاسی جماعتوں کے رہنما بھی شریک تھے۔
جماعتی حریت کانفرنس آزاد جموں کشمیر کے کنوینر محمود احمد ساغر کی قیادت میں مظاہرین نے سیاہ جھنڈے، بینرز اور پلے کارڈز اٹھا رکھے تھے جن پر بھارت مخالف اور آزادی کے حق میں نعرے درج تھے۔ مظاہرے میں سابق وزیراعظم راجہ محمد فاروق حیدر خان نے خصوصی طور پر شرکت کی۔ مظاہرے میں آزاد کشمیر جماعت اسلامی کے سابق امیر عبدالرشید ترابی، حریت رہنماؤں سید یوسف نسیم، فاروق رحمانی، غلام محمد صفی، الطاف حسین وانی اور غلام نبی بٹ نے بھی شرکت کی۔
حریت کانفرنس کے رہنما شیخ عبدالمتین کے علاوہ سید فیض نقشبندی، زاہد صافی، مسلم کانفرنس کی جنرل سیکرٹری مہر النساء، سمیعہ ساجد، سینئر صحافی بشیر عثمانی، مہتاب اشرف، راشد کاظمی، ڈائریکٹر لبریشن سیل راجہ خان افسر خان، سردار عثمان بزدار اور دیگر بھی موجود تھے۔ احتجاجی ریلی سے ساجد محمود، سردار نجیب الغفور خان، چوہدری شاہین، رفیق ڈار اور دیگر نے خطاب کیا۔
اس موقع پر مقررین نے کہا کہ جمہوریت عوامی رائے کے احترام کا نام ہے لیکن بھارت نے کبھی اس کا احترام نہیں کیا۔ انہوں نے کہا کہ بھارت کو مقبوضہ جموں میں اپنا یوم جمہوریہ منانے کا کوئی حق نہیں ہے کیونکہ اس نے کشمیریوں کی مرضی کے خلاف جموں و کشمیر پر قبضہ کر رکھا ہے۔
