پاکستان کرکٹ ٹیم کے سابق کپتان شاہد آفریدی کا کہنا ہے کہ پاکستان ٹیم کی قیادت کرنا پھولوں کا بستر نہیں ہے لیکن قومی ٹیم کی قیادت کرنا ایک بڑے اعزاز کی بات ہے۔
شاہد آفریدی کا ایک کلپ سوشل میڈیا پر وائرل ہورہا ہے جس میں میزبان نے ان سے سوال کیا ہے کہ پاکستان ٹیم کی قیادت کا تجربہ کیسا ہے؟
اس پر سابق کپتان شاہد آفریدی کا کہنا تھا کہ پاکستان ٹیم کی قیادت کرنا ایک بڑے اعزاز کی بات ہے ، میں ہمیشہ کہتا ہوں کہ پاکستان ٹیم کی قیادت کرنا آسان نہیں ہے یہ پھولوں کا بستر نہیں ہے
اپنی بات کو تفصیل سے بیان کرتے ہوئے ان کا کہنا تھا کہ اگر ٹیم پرفارم نہ کرے تو تمام تر ذمہ داری کپتان پر ڈالی جاتی ہے، اسی لیے میں کہتا ہوں کہ ایک کپتان کی ذمہ داریاں زیادہ ہیں کیونکہ میڈیا ،سلیکشن کمیٹی ، بورڈ اور شائقین کرکٹ سب کا سامنا وہ ہی کرتا ہے۔ ان کا مزید کہنا تھا کہ اگرچہ یہ ساری چیزیں لے کر چلنا مشکل ہے لیکن اگر آپ کی مینجمنٹ اچھی ہے تو ایک کپتان کے توڑ پر آپ یہ ساری ذمہ داریاں بہت احسن طریقے سے نبھا سکتے ہیں ۔
