مغربی کنارے پر اسرائیل کے ڈرون حملے میں 6 فلسطینی شہید ہوگئے۔
غیرملکی میڈیا کے مطابق اسرائیل بربریت سے غزہ کے معصوم فلسطینیوں پر اپنی جارحیت جاری رکھے ہوئے ہے جہاں وہ فلسطینیوں پر زمینی اور فضائی حملے کررہا ہے۔
میڈیا رپورٹس میں بتایا گیا ہے کہ طولکوم میں بھی اسرائیلی فوج کا بڑا آپریشن جاری ہے۔ اگر غزہ کی بات کی جائے تو ں زمینی آپریشن کرنے والے اسرائیلی فوج پر فلسطینی مزاحمتی گروپ حماس بھی جوابی کارروائی کررہی ہے، جنہوں نے اسرائیلی ٹینکوں پر راکٹوں سے حملے کیے ہیں اور آئی ای ڈیز سے فوجیوں کو نشانہ بنایا۔
مزید یہ کہ اسرائیل فوج نے حماس کے حملوں میں3 فوجیوں کی ہلاکت اور 9 اسرائیلی فوجی اہلکاروں کے زخمی ہونے کی تصدیق کی ہے۔ دوسری جانب جنوبی لبنان پر بھی اسرائیل کے حملے تیز ہوگئے ہیں، سرحدی علاقے میں گھر پر بمباری سے تین لبنانی شہری شہید ہوگئے جبکہ حزب اللہ نے بھی 9 اسرائیلی اہداف کو نشانہ بنایا۔
اسرائیلی آرمی چیف کا کہنا ہے غزہ میں سیف زون میں بھی کارروائیاں کرتے رہیں گے اور ساتھ ہی اسرائیل نے جنگ مہینوں جاری رہنے کا عندیہ دیا ہے۔ یاد رہے کہ 7 اکتوبر سے اب تک اسرائیلی وحشیانہ بمباری سے 20 ہزار 977 سے زائد فلسطینی شہید ہو چکے ہیں جبکہ 54 ہزار 536 افراد زخمی ہوئے ہیں۔
