مس ڈیکلریشن اور کسٹمز ایکٹ کی خلاف ورزی کر کے ڈیوٹی ٹیکسز کی مد سرکاری خزانے کوبھاری نقصان پہچانے کی کوشش پر پاکستان کسٹمز نے اسلام آباد ڈرائی پورٹ پر کارروائی کرتے ہوئے غیر ملکی سوئٹرز کی کھیپ قبضے میں لے لی۔
ذرائع کے مطابق امپورٹر نے کلیئرنگ ایجنٹس کے ساتھ مل کر سرکاری خزانے کو تقریباً 1 کروڑ روپے کا نقصان پہچانے کی کوشش کی، جنید صدیقی نامی امپورٹر اور کسٹمز کلیئرنگ ایجنٹ عبدالوحید اور مشتاق احمد کے خلاف تھانہ آئی اینڈ پی کسٹمز کلکٹریٹ اسلام آباد میں کسٹمز ڈرائی پورٹ کے اپریزنگ آفیسر نعمان علی کی مدعیت میں مقدمہ درج کرلیا گیا ہے۔
جس کے متن کے مطابق اطلاع ملتے ہی اسسٹنٹ کلیکٹر نے اپنی نگرانی میں چیکنگ کے لیے ٹیم تشکیل دی ، جس نے کھیپ کی جانچ پڑتال کی تو 36 ہزار 7 سو 32 غیر ملکی سوئٹرز برآمد ہوئے۔ جی ڈی (ریکارڈ ) پر غیر ملکی سوئٹرز کی تعداد 11 ہزار 2سو50 ظاہر کی گئی تھی۔
امپورٹر جنید صدیقی اور کسٹمز کلیئرنگ ایجنٹ عبدالوحید و مشتاق احمد نے ملی بھگت و بدنیتی سے مس ڈیکلریشن کرکے کسٹمز ڈیوٹی و ٹیکس کی مد میں سرکاری خزانے کو 99 لاکھ 49 ہزارروپے سے زائدکا نقصان پہنچانے کی کوشش کی۔
حکام کے مطابق امپورٹر کی تمام کھیپ اور کنٹینر قبضے میں لے کر کسٹمز ایکٹ کے تحت مقدمہ درج کرکے تفتیش شروع کردی گئی ہے۔
