وفاقی وزیر داخلہ محسن نقوی سے امریکی سفیرڈونلڈ بلوم کی الوداعی ملاقات ہوئی،باہمی دلچسپی کے امور اور پاک امریکا تعلقات پرتبادلہ خیال ہوا،وزیرداخلہ نےدونوں ممالک کے درمیان تعلقات کے فروغ کے لیے ڈونلڈ بلوم کی خدمات کو سراہا اور ان کے لیے نیک خواہشات کا اظہار کیا۔
وزیر داخلہ اور امریکی سفیر نے ملاقات میں دہشت گردی،علاقائی استحکام اور باہمی تعلقات پر گفتگو کی۔ امریکی سفیر نے پاکستان میں حالیہ دہشت گردی کے واقعات کی مذمت کی۔وزیر داخلہ نے کہا دہشت گردی ایک عالمی مسئلہ ہے،عالمی برادری کو مل کر دہشت گردی کے خاتمے کے لیے ایک جامع لائحہ عمل بنانا ہوگا۔
انہوں نے مزید کہا کہ پاکستان میں کسی بھی غیرقانونی غیر ملکی کو رہنےکی اجازت نہیں دی جائے گی۔ امریکی سفیرڈونلڈ بلوم نے اپنی تعیناتی کے دوران پاکستانی اداروں کے بھرپور تعاون کو سراہا۔ملاقات میں وفاقی سیکرٹری داخلہ خرم علی آغا اور امریکی ڈپٹی ہیڈ آف مشن نیٹلی بیکر بھی موجود تھیں۔
