نیشنل ڈیزاسٹر مینجمنٹ اتھارٹی( این ڈی ایم اے) نے آزاد کشمیر میں شدید بارشوں کا الرٹ جاری کردیا ،الرٹ کے مطابق شدید بارشوں کے باعث شہری و نشیبی علاقوں میں سیلابی صورتحال، ندی نالوں میں طغیانی اور پہاڑی علاقوں میں لینڈ سلائیڈنگ کا خدشہ ظاہر کیا گیا ہے ۔
اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر (این ای او سی) نے آزاد جموں و کشمیر کے مختلف اضلاع میں اگلے 12 سے 24 گھنٹوں کے دوران شدید بارشوں کا الرٹ جاری کیا ہے ۔
جاری الرٹ کے مطابق شدید بارشوں کے باعث شہری و نشیبی علاقوں میں سیلابی صورتحال، ندی نالوں میں طغیانی اور پہاڑی علاقوں میں لینڈ سلائیڈنگ کا خدشہ ظاہر کیا گیا ہے ۔
این ڈی ایم اے نے کہا ہے کہ آزاد کشمیر کے اضلاع نیلم ویلی، باغ، کوٹلی، راولاکوٹ، مظفرآباد اور حویلی میں وقفے وقفے سے بارش متوقع ہے، جو نشیبی علاقوں میں سیلاب اور پہاڑی علاقوں میں لینڈ سلائیڈنگ کا باعث بن سکتی ہے ۔
این ڈی ایم اے نے خبردار کیا ہے کہ شدید بارشوں سے پہاڑی نالوں میں پانی کا تیز بہاؤ رابطہ سڑکوں پر ٹریفک کی روانی کو متاثر کر سکتا ہے ۔
دریائے ستلج میں بہاؤ کے اضافے اور ممکنہ سیلابی صورتحال کے پیش نظر این ڈی ایم اے نے پہلے ہی الرٹ جاری کر رکھا ہے۔ متعلقہ اداروں نے ستلج کے قریبی علاقوں سے بڑے پیمانے پر انخلاء کی کارروائیاں شروع کر دی ہیں ۔
