پہاڑی علاقوں میں برفباری کے باعث سیاحوں کیلئے گائیڈ لائنز جاری کردی گئیں، جس میں ضروری اشیا ساتھ رکھنے اور گرم کپڑوں کے استعمال کی ہدایت کی گئی ہے۔ تفصیلات کے مطابق خیبرپختونخوا کے پہاڑی علاقوں میں برفباری کے آغاز کے ساتھ ہی سیاحوں کیلئے گائیڈ لائنز جاری کردی گئیں۔
ترجمان ٹورازم اتھارٹی نے کہا ہے کہ سیاح سیاحتی مقامات کا رخ کرنے سے قبل ضروری اشیا ساتھ رکھیں اور برف باری والے مقامات کیلئے سنو چین اور گرم کپڑوں کااستعمال کریں۔
ترجمان نے کہا کہ سیاح سفر پر روانہ ہونے سے قبل ٹورازم ہیلپ لائن 1422 سے معلومات بھی حاصل کر سکتے ہیں، ٹورازم پولیس کے جوان کیلاش سمیت مختلف سیاحتی مقامات پر ڈیوٹی سر انجام دے رہے ہیں۔
ترجمان کا کہنا تھا کہ 2025کی پہلی برف باری وادی کیلاش اورکالام میں شروع ہوئی ہے، چترال لوئر کے پہاڑوں نے بھی سفید چادر اوڑھ لی ہے۔
خیال رہے سوات کی وادی کالام میں طویل خوشک سالی کےبعد برف باری نے وادی کا حسن دوبالا کردیا، جس سے سردی کی شدت میں بھی اضافہ ہوگیا۔
محکمہ موسمیات کا کہنا ہے آئندہ چوبیس گھنٹے تک برفباری وقفے وقفے سے جاری رہے گی جبکہ مقامی انتظامیہ کا کہنا ہےشہری موسم کو دیکھتے ہوئے وادی کا رخ کریں، برف باری کی وجہ سےٹریفک کی روانی متاثر ہے اورمسافروں کو سفری مشکلات کاسامنا بھی کرنا پڑرہا ہے۔
