تحصیل حویلیاں میں تجاوزات کے خلاف گرینڈ آپریشن کر کے متعدد دکانداروں کو جرمانے عائد اور گرفتاریاں عمل میں لائی گئیں۔
تفصیلات کے مطابق ضلعی انتظامیہ ایبٹ آباد کے مطابق ڈپٹی کمشنر سرمد سلیم اکرم کی خصوصی ہدایات پر تحصیل حویلیاں میں ٹریفک کی روانی کو بہتر بنانے اور تجاوزات کے خاتمے کے لیے ایک جامع اور بھرپور گرینڈ آپریشن کیا گیا جسکی نگرانی ایڈیشنل اسسٹنٹ کمشنر حویلیاں سمیرا محسود نے کی جبکہ اس موقع پر ڈی ایس پی ٹریفک حویلیاں،ٹی ایم اے اور دیگر متعلقہ محکموں کے افسران و اہلکار بھی موجود تھے۔
انتظامیہ کی جانب سے بازاروں اور اہم شاہراہوں پر قائم تجاوزات کا خاتمہ کیا گیا،سڑکوں اور فٹ پاتھوں پر قائم غیر قانونی سٹالز اور ریڑھی بانوں کو ہٹا کر انہیں مقررہ مقامات پر منتقل کیا گیا تاکہ شہریوں کو آمدورفت میں سہولت میسر آ سکے اور ٹریفک کی روانی متاثر نہ ہو۔
دکانوں کے سامنے سامان سجا کر مقررہ حدود سے تجاوز کرنے والے دکانداروں پر بھاری جرمانے عائد کیے گئے اور متعدد خلاف ورزیوں پر سخت قانونی کارروائی عمل میں لائی گئی جبکہ بعض افراد کو قانون کے مطابق گرفتار کر کے جیل بھیج دیا گیا۔اسی طرح سڑکوں پر غیر قانونی پارکنگ کے خلاف بھی کارروائی کی گئی۔
انتظامیہ نے واضح کیا کہ شہری حدود میں ٹریفک کی بہتری اور عوامی سہولت کے لیے کسی قسم کی خلاف ورزی برداشت نہیں کی جائے گی۔
