وزیرِ اعظم کی تکنیکی و فنی تعلیم کو یکساں کرنے اور بیرونِ ملک پاکستانی افرادی قوت کے بہتر روزگار کیلئے پاکستان سکل کمپنی قائم کرنے کی ہدایت کی ہے۔
اسلام آباد میں وزارت سمندر پار پاکستانیوں اور انسانی وسائل کی ترقی کے حوالے سے ایک سیکٹرل بریفنگ کی صدارت کرتے ہوئے، انہوں نے ملک بھر میں فنی اور پیشہ ورانہ تعلیم کو یکجا کرنے کی ہدایت کی۔ انہوں نے پاکستان سکل ڈویلپمنٹ فنڈ کے فوری قیام کی بھی ہدایت کی۔
وزیراعظم نے کہا کہ نوجوان افرادی قوت کو عالمی معیار کی تکنیکی اور پیشہ ورانہ تربیت کی فراہمی کو یقینی بنانے کے لیے نیشنل ووکیشنل اینڈ ٹیکنیکل ٹریننگ کمیشن کو مزید فعال کیا جانا چاہیے۔ تمام تکنیکی شعبوں میں عالمی سطح پر معروف اور بین الاقوامی سرٹیفیکیشن کو یقینی بنایا جائے۔شہباز شریف نے بین الاقوامی معیار کے مطابق پاکستانی افرادی قوت کی ترقی کے لیے وفاقی اداروں اور صوبوں کے درمیان زیادہ سے زیادہ تعاون کی اہمیت پر زور دیا۔
اجلاس میں وفاقی وزرا احد خان چیمہ، خالد مقبول صدیقی، وزیرِ مملکت شزہ فاطمہ خواجہ، چیئرمین وزیرِ اعظم یوتھ پروگرام رانا مشہود احمد خان، وزیرِ اعظم کے کوارڈینیٹر رانا احسان افضل، قومی کوارڈینیٹر خصوصی سرمایہ کاری سہولت کونسل لیفٹیننٹ جنرل سرفراز احمد، ڈپٹی چیئرمین پلاننگ کمیشن جہانزیب خان اور متعلقہ اعلیٰ حکام نے شرکت کی۔اجلاس میں وزیرِ اعظم کواین اے وی ٹی ٹی سی کے پاکستان میں افرادی قوت کی تکنیکی و فنی تربیت کے حوالے سے اقدامات کے بارے بتایا گیا۔ اجلاس کو بتایا گیا کہ این اے وی ٹی ٹی سی رواں برس 60 ہزار افراد کو تکنیکی و فنی تربیت فراہم کرے گا۔
شہباز شریف نے بیرون ملک پاکستانی ٹیکنیکل اور ووکیشنل افرادی قوت کی ملازمت کے حوالے سے کمپنیوں کے لائسنسنگ نظام میں اصلاحات کی ہدایت کی۔وزیراعظم نے کہا کہ پاکستانی سفارت خانوں میں کمیونٹی ویلفیئر کی تقرریوں میں میرٹ اور شفافیت کا خاص خیال رکھا جائے۔
شہباز شریف نے نیشنل ووکیشنل اینڈ ٹیکنیکل ٹریننگ کمیشن اور وزارت سمندر پار پاکستانیوں اور انسانی وسائل کی ترقی میں اصلاحات کے لیے کمیٹی بنانے کی بھی ہدایت کی۔ اجلاس کو بتایا گیا کہ یشنل ووکیشنل اینڈ ٹیکنیکل ٹریننگ کمیشن اس سال ساٹھ ہزار افراد کو فنی تربیت فراہم کرے گا۔بتایا گیا کہ اصلاحات کے آغاز کے بعد آئندہ تین سالوں میں کل چھ لاکھ افراد کو فنی اور پیشہ ورانہ تربیت فراہم کی جائے گی۔
