وفاقی وزیر برائے مواصلات عبدالعلیم خان نے کہا کہ ٹول پلازوں پر بھیڑ کو کم کرنے کی کوششوں کے تحت ایم ٹیگ والی گاڑیوں کو خصوصی رعایت دی جائے گی۔
وفاقی وزیر نے اس بات کا اعلان سینیٹ کی قائمہ کمیٹی برائے مواصلات کے اجلاس کے دوران کیا جس کی صدارت پرویز رشید نے کی۔ "یہ قدم ایم ٹیگ کے استعمال کو فروغ دینے کے لیے بھی اٹھایا جا رہا ہے "انہوں نے کمیٹی کو بتایا کہ ملک کے سڑکوں کا 42 فیصد نیٹ ورک بلوچستان میں ہے لیکن بدقسمتی سے وہاں ایک بھی ٹول پلازہ نہیں ہے جس کی وجہ سے سڑکوں کی مرمت اور بہتری کے منصوبوں میں رکاوٹ ہے۔ گلگت بلتستان میں 900 کلومیٹر سڑکیں اور صرف ایک ٹول پلازہ ہے۔
انہوں نے کہا کہ گزشتہ سال 200 روپے کا ٹول ٹیکس تھا۔ ہائی ویز اور موٹر ویز پر 60 ارب روپے اکٹھے کیے گئے جو اب بڑھا کر 100 ارب روپے سے زائد ہو جائیں گے ۔کمیٹی کو بتایا گیا کہ ملک میں 38 ملین گاڑیاں ہیں جن میں سے 70 فیصد موٹر سائیکلیں ہیں۔ 27 لاکھ بڑی گاڑیاں ہیں جن میں سے 70 فیصد پرانی ہیں۔
توجہ دلاؤ نوٹس کا جواب دیتے ہوئے، وزیر مواصلات عبدالعلیم خان نے بتایا کہ نیشنل ہائی وے اتھارٹی بلوچستان کی مختلف شاہراہوں پر 2500 موٹر وے پولیس اہلکاروں کو تعینات کرنے جا رہی ہے تاکہ اوور سپیڈنگ کو روکا جا سکے اور ساتھ ہی مسافروں کے لیے محفوظ سڑکوں کو یقینی بنایا جا سکے۔
