ملک میں مسلسل پانچویں مرتبہ پیٹرولیم مصنوعات، پیٹرول اور ہائی اسپیڈ ڈیزل کی قیمتوں میں یکم اکتوبر سے کمی متوقع ہے۔
ذرائع کے مطابق 30 ستمبر کی رات پٹرول، ڈیزل اور کیروسین آئل کی قیمتوں میں نمایاں کمی ہونے کی اعلیٰ ترین سرکاری سطح پر تصدیق ہو گئی۔
وفاقی وزیر خزانہ محمد اورنگزیب کا کہنا ہے کہ افراط زر میں نمایاں کمی کے بعد اب افراطِ زر سنگل ڈیجٹ میں آ گئی ہے جس کی وجہ سے پٹرولیم مصنوعات کی قیمتوں میں نمایاں کمی ہو گئی۔
یاد رہے کہ ملک میں ڈیڑھ ماہ میں پٹرول 26.5 روپے اور ڈیزل 34 روپے فی لیٹر سستا ہوا، مہنگائی کی شرح میں بھی نمایاں کمی اور شرح سود میں 2 فی صد کمی کر دی گئی ہے۔
دوسری جانب انٹرنیشنل مارکیٹ میں خام تیل کی قیمتوں میں مسلسل کمی کا رجحان ابھی تک جاری ہے۔ نومبر کے لئے برینٹ کروڈ آئل کے سودے 48 سینٹ کمی کے ساتھ 72.27 ڈالر جبکہ امریکی کروڈ آئل کی اکتوبر کے لئے قیمت میں بھی 37 سینٹ کی کمی ہو گئی ہے۔
عالمی مارکیٹ میں تیل کی قیمت میں حالیہ کمی کا تعلق چین میں ایندھن کی طلب میں معمولی کمی کے ساتھ برآمدی مارجن میں کمی سے ہے۔ اس رجحان کے آئندہ کئی روز تک جاری رہنے کا امکان ہے۔
