گلگت( ندیم خان ) سٹی ہسپتال میں منشیات فروش اور پولیس کے مابین فائرنگ کا تبادلہ ہوا ہے جس میں خاتون مریضہ جاں بحق۔ ہو گئی، فائرنگ کرنے والے پولیس اہلکار کو گرفتار کرکے انسداد دہشت گردی کے تحت مقدمہ درج کرلیا گیا، ایس ایس پی اور متعلقہ ایس ایچ او کو معطل کردیا گیا ۔
سٹی ہسپتال میں منشیات فروش اور پولیس کے مابین فائرنگ سے خاتون مریضہ سر پر گولی لگنے سے جاں بحق ہو گئی، واقعہ گزشتہ شب سٹی ہسپتال گلگت میں پیش آیا تھا جہاں پولیس ملزم کی گرفتاری کیلئے کارروائی کررہی تھی کہ اس دوران فائرنگ کا تبادلہ ہوا ۔
اس دوران علاج کیلئے آئی مریضہ سر میں گولی لگنے سے موقع پر ہی جاں بحق ہوئی، جاں بحق خاتون کا تعلق کشروٹ گلگت سے تھا ۔
واقعے پر وزیر اعلی نے نوٹس لیتے ہوئے آئی جی گلگت بلتستان اور سیکریٹری داخلہ سے فوری رہورٹ طلب کرلی، پولیس کے مطابق واقعے میں ملوث پولیس اہلکاروں کو گرفتار کرلیا گیا ہے اور انکے خلاف ہسپتال میں اندھادھند فائرنگ کرنے پر انسداد دہشت گردی کے تحت مقدمات درج کئے گئے ہیں جبکہ ایس ایس پی گلگت ظہور احمد اور متعلقہ تھانے کے ایس ایچ او کو معطل کردیا گیا ۔
دوسری جانب وزیر اعلی نے متاثرہ خاندان کے مالی تعاون اور گھر کے ایک فرد کو سرکاری نوکری کا حکم دیا ہے اور واقعے میں ملوث ملزمان کے خلاف بلاتفریق قانونی کارروائی کا حکم دیا ہے ۔
لواحقین نے حکومت سے بے گناہ خاتون کو شہید کرنے والے ملزمان کے خلاف سخت کارروائی کا مطالبہ کیا ہے ۔
