وزیراعلیٰ گلگت بلتستان حاجی گلبر خان نے مراد علی شاہ سے ملاقات کی گلبر خان نے وزیراعلیٰ سندھ کے سامنے مطالبہ رکھا کہ سندھ کے میڈیکل اور انجنیئرنگ کالیجز میں جی بی کے بچوں کی سیٹیں بڑھائی جائیں کیوںکہ کراچی میں گلگت بلتستان کے 10 ہزار بچے زیر تعلیم ہیں۔
اس ملاقات میں گلگت بلتستان کے وزیر برائے ایکسائیز حاجی رحمت خلیق اور گلبر خان کے اسپیشل اسسٹنٹ حسین شاہ نے بھی شرکت کی۔ ملاقات میں مراد علی شاہ کا اس معاملہ پر یقین دہانی کراتے ہوئے کہنا تھا کہ گلگت بلتستان کی بچوں کی سندھ کی یونیورسٹیوں میں سیٹیں بڑھانے کا بطور خود جائزہ لیں گے۔
وزیراعلیٰ گلبر خان نے مراد علی شاہ سے درخواست کی کہ کراچی میں گلگت بلتستان کے بچوں کو ایک ہاسٹل بنا کر دیں۔ وزیراعلیٰ سندھ نے کہا کہ پیپلز پارٹی حکومت زمین کا تعین کرکے ہاسٹل کا منصوبہ بھی پایہ تکمیل تک پہنچائے گی۔
انھوں نے مزید کہا کہ بلاول بھٹو نے ان کو گلگت بلتستان میں این آئی سی وی ڈی قائم کرنے کی ہدایت دی ہے۔ وزیراعلیٰ سندھ نے جلد گلگت بلتستان کا دورہ کرنے کی بھی خواہش کا اظہار کرتے ہوئے کہا کہ جو سہولیات سندھ حکومت فراہم کرے گی ان کا اعلان بھی وہاں آکر کروں گا۔
وزیراعلیٰ گلگت بلتستان اور ملاقات میں موجود وزراء نے پیپلز پارٹی کی گلگت بلتستان میں خدمات کو سراہا۔ وزیراعلیٰ گلبر خان نے کہا کہ سندھ حکومت کا ہیلتھ سیکٹر میں کام بہت زبردست ہے جس پر وزیراعلیٰ سندھ نے وزیراعلیٰ گلگت بلتستان کا شکریہ ادا کیا۔
