غیرملکی وفود کی اسلام آباد آمد کے باعث وفاقی دارالحکومت میں سکیورٹی انتظامات انتہائی سخت کر دیے گئے ہیں۔ اسلام آباد پولیس کے ترجمان کے مطابق ریڈ زون اور اطراف ماسوائے سرکاری گاڑیوں کے ہرقسم کی ٹریفک کے لیے بند ہے۔
انتظامیہ کی جانب سے شہریوں سے درخواست کی گئی ہے کہ کسی بھی سفری دشواری سے بچنے کے لیے ریڈ زون اور اس کے گرد و نواح میں غیر ضروری سفر سے اجتناب کریں۔ اسلام آباد ٹریفک پولیس عوام کی رہنمائی اور سہولت کے لیے سڑکوں پر موجود ہے اور ٹریفک کی روانی کو برقرار رکھنے کے لیے اقدامات کر رہی ہے۔
شہریوں کو ہدایت کی گئی ہے کہ اس دوران صبر و تحمل کا مظاہرہ کریں اور ٹریفک پولیس کے ساتھ مکمل تعاون کریں۔ شہری مزید معلومات اسلام آباد ٹریفک پولیس کے وٹس ایپ چینل اور سوشل میڈیا پیجز سے حاصل کرسکتے ہیں۔
