وفاقی وزیر برائے امور کشمیر و گلگت بلتستان انجینئر امیر مقام نے چیف سیکرٹری آفس کا دورہ کیا اور چیف سیکرٹری گلگت بلتستان ابرار احمد مرزا، ایڈیشنل چیف سیکرٹری مشتاق احمد اور آئی جی گلگت بلتستان افضل محمود بٹ سے ملاقات کی۔
ملاقات میں گلگت بلتستان سے متعلق مختلف امور پر تبادلہ خیال کیا گیا‘ وفاقی وزیر نے کہا کہ گلگت بلتستان کے عوام کے مسائل ترجیحی بنیادوں پر حل کئے جائیں گے۔ انجینئر امیر مقام نے مزید کہا کہ مسلم لیگ (ن) کے قائد محمد نواز شریف نے ہمیشہ آزاد کشمیر اور گلگت بلتستان کے علاقوں کو اپنے دل کے قریب سمجھا ہے جس کا ثبوت ان علاقوں میں مکمل ہونے والے متعدد میگا پراجیکٹس سے ملتا ہے۔
انہوں نے کہا کہ گلگت بلتستان کی خوشحالی دراصل پاکستان کی خوشحالی ہے، سی پیک اور سیاحت کے شعبوں میں حکومت کی کاوشیں آنے والے دنوں میں پاکستان کی معاشی ترقی میں کلیدی کردار ادا کریں گی۔ قبل ازیں وفاقی وزیر کا چیف سیکرٹری آفس پہنچنے پر چیف سیکرٹری گلگت بلتستان ابرار احمد مرزا، ایڈیشنل چیف سیکرٹری مشتاق احمد، آئی جی گلگت بلتستان افضال محمود بٹ اور دیگر اعلیٰ حکام نے استقبال کیا۔
