ترجمان دفتر خارجہ شفقت علی خان نے کہا ہے کہ وفاقی حکومت نے پاکستانی صحافیوں کے دورہ اسرائیل کی رپورٹس کا نوٹس لیا ہے ۔
اسلام آباد: دفتر خارجہ کے ترجمان نے اپنے بیان میں کہا کہ پاکستانی پاسپورٹ پر درج ہے یہ ’اسرائیل کے سفر کےلیے قابل استعمال نہیں‘، موجودہ قوانین کے تحت پاسپورٹ پر اسرائیل کا دورہ ممکن نہیں ۔
ترجمان شفقت علی خان کا کہنا تھاکہ پاکستان کا اسرائیل کے بارے میں مؤقف تبدیل نہیں ہوا، پاکستان اسرائیل کو تسلیم نہیں کرتا اور پاکستان فلسطینی عوام کے جائز حقوق کی غیر متزلزل حمایت کرتا ہے ۔
انہوں نے کہا کہ ان حقوق میں 1967 سے پیشگی سرحدوں پر مشتمل آزاد و خودمختار فلسطینی ریاست کا قیام شامل ہے، آزاد و خود مختار فلسطینی ریاست کا دارالحکومت القدس الشریف ہو ۔
ان کا کہنا تھاکہ پاکستان مسئلہ فلسطین کے منصفانہ حل کےلیے غیر متزلزل وابستگی کا اعادہ کرتا ہے ۔
