قومی اسمبلی کا بجٹ اجلاس آج شام 5 بجے سپیکر ایاز صادق کی زیر صدارت ہوگا جس میں وزیر خزانہ محمد اورنگزیب وفاقی بجٹ 26-2025 پیش کریں گے، بجٹ میں توانائی کےمنصوبوں کے لیے 144 ارب، ٹرانسپورٹ،کمیونیکیشنز کے لیے 332 ارب روپے، پانی کے منصوبوں کے لیے 109 ارب روپے جبکہ آزاد کشمیر، گلگت بلتستان اور خصوصی علاقوں کے لیے 63 ارب روپے جبکہ موسمیاتی تبدیلی کا ترقیاتی بجٹ 2 ارب 78 کروڑ 40 لاکھ روپے مختص کرنے کی تجویز ہے ۔
آئندہ مالی سال کے بجٹ میں سرکاری ملازمین کی تنخواہوں اور پینشن میں 10 فیصد تک جبکہ کم سے کم تنخواہ میں بھی اضافے کی تجویز ہے ۔
وفاقی بجٹ میں نان فائلرز کے لیے مزید سخت اقدامات متوقع ہیں، پیٹرولیم مصنوعات کی کیش خریداری کی حوصلہ شکنی کے لیے اقدامات کیے جاسکتے ہیں جبکہ ہر قسم کی کیش خریداری پر بھی اضافی ٹیکس کی تجویز ہے ۔
بجٹ میں پیٹرولیم لیوی بڑھانے کے ساتھ ساتھ کاربن لیوی عائد کرنے کی تجویز بھی زیر غور ہے جبکہ ڈیجیٹل سروسز پر بھی ٹیکس عائد کرنے کی تجویز شامل ہے ۔
آئندہ مالی سال کے وفاقی بجٹ میں کھاد پر فیڈرل ایکسائز ڈیوٹی (ایف ای ڈی) 5 سے بڑھا کر 10 فیصدکرنے کی تجویز ہے جبکہ زرعی ادویات پر 5 فیصد فیڈرل ایکسائز ڈیوٹی عائد کیے جانے کی بھی تجویز ہے ۔
دریں اثنا، درآمدی گاڑیوں پر ڈیوٹی میں ردوبدل کی بھی تجاویز بجٹ میں شامل ہے جبکہ سود سے حاصل آمدن پر ود ہولڈنگ ٹیکس بڑھانے کی تجویز ہے، بجٹ میں سود کی ادائیگی کے لیے 8 ہزار ارب روپے سے زائد اخراجات کا تخمینہ ہے جبکہ ہنگامی اخراجات کے لیے 300 ارب سے زائد مختص کیے جانے کا امکان ہے ۔
علاوہ ازیں، بجٹ میں فروزن فوڈز، چپس، کولڈ ڈرنکس، نوڈلز، آئس کریم، بسکٹس، فروزن گوشت، ساسز اور تیار شدہ خوراک پر 5 فیصد ایکسائز ڈیوٹی عائد کرنے کی تجویز ہے، اسی طرح ای کامرس پر 18 فیصد سیلز ٹیکس عائد کرنے کی تجویز ہے ۔
آئندہ مالی سال کے لیے معاشی شرح نمو کا ہدف 4.2 فیصد اور مجموعی سرمایہ کاری کا ہدف 14.7 فیصد مقرر کرنے کی تجویز ہے جبکہ مہنگائی کا سالانہ اوسط ہدف 7.5 فیصد تجویز کیا گیا ہے ۔
