ڈیوس کپ ٹینس ٹائی،پاک بھارت میچز تین اور چار فروری کو اسلام آباد میں کھیلے جائیں گے۔
پاکستان اور بھارت کے درمیان بالترتیب تین اور چارفروری کو ڈیوس کپ ٹائی ٹینس کمپلیکس اسلام آباد میں کھیلا جائیگا۔پاکستان میں انٹرنیشنل ٹینس فیڈریشن کے تحت شیڈول ڈیوس کپ ٹینس ٹائی میں شرکت کے لیے بھارتی ٹینس ٹیم اسلام آباد پہنچ چکی ہے۔
تفصیلات کے مطابق بھارتی ٹینس ٹیم بذریعہ ہوائی جہاز اسلام آباد پہنچی اور ٹیم میں 5 کھلاڑیوں کے ساتھ دیگر آفیشلز میں دو فزیو اور ایک،ایک کوچ، منیجر اورکوآررڈینیٹر بھی شامل ہیں ۔ ڈیوس کپ کیلئے اسلام آباد پہنچنے والی بھارتی ٹیم کے ہمراہ صحافی بھی پاکستان آئے ہیں اور بھارتی ٹینس ٹیم وفاقی دارالحکومت میں ٹینس کمپلیکس کے پاس مقامی ہوٹل میں قیام کرے گی۔ یاد رہے کہ دہلی میں قائم پاکستانی ہائی کمیشن نے چھبیس جنوری کو ڈیوس کپ میں شرکت کیلئے پاکستان آنے والے بھارتی کھلاڑیوں کو ویزے جاری کردیے تھے۔
