نائیجیریا میں زیادہ افراد بٹھانے پر کشتی سمندر میں ڈوب گئی، کشتی میں سوار 300 افراد میں سے 100 لاپتہ ہوگئے ـ
غیر ملکی خبررساں ادارے کی رپورٹ کے مطابق ، کشتی نائیجیریا کے ضلع موقوا کے مقام پر دریائے نائیجر میں ڈوبی جس کے ریسکیو کا عمل شروع کردیا گیا ہے۔
رپورٹس کے مطابق ،کشتی مقامی طور پر لکڑی سے تیار کی گئی تھی جس میں صرف100 افراد کے سفر کرنے کی گنجائش تھی، مگر جب کشتی کی روانہ ہونے لگی تو اس وقت اس میں 300 افراد سوار ہوگئے، جن میں زیادہ تعداد خواتین اور بچوں کی تھی ـحادثے کی اطلاع کے بعد مقامی حکام کی طرف سے 150 افراد کو بحفاظت سمندر سے باہر نکال لیا گیا مگر ابھی بھی 100 افراد کا کچھ پتہ نہیں چل سکا۔
کشتی حادثے کے حوالے سے متضاد دعوے سامنے آرہے ہیں، مقامی اخبار کی رپورٹ میں کہا گیا ہے کہ 9 افراد کی لاشیں ملی ہیں، جبکہ لوکل کونسل کے ایک رہنما نے 60 افراد کی لاشیں ملنے کا دعویٰ کیا ہے۔
اس سے قبل نائیجیریا میں آئل ٹینکر اور ٹرک میں خوفناک تصادم کے نتیجے میں 48 افراد جان کی بازی ہار گئے تھے۔
رپورٹس کے مطابق آئل ٹینکر سڑک سے گزرتے ہوئے مسافروں اور مویشیوں سے بھرے ٹرک سے ٹکرا گیا۔
حکام کا کہنا ہے کہ زوردار ٹکر کے باعث آئل ٹینکر دھماکے سے پھٹ گیا اور مسافر بردار ٹرک سمیت دیگر گاڑیوں میں آگ لگ گئی۔
