بنوں: سرکلر روڈ کے علاقے میں نامعلوم مسلح افراد نے ایک ایمبولینس پر فائرنگ کر دی، جس کے نتیجے میں چار افراد جاں بحق ہو گئے۔
پولیس کے مطابق واقعہ بنو میراخیل تھانے کی حدود میں پیش آیا، جہاں نامعلوم افراد نے ایک نجی تنظیم کی ایمبولینس کو نشانہ بنایا۔ فائرنگ کے نتیجے میں چار افراد موقع پر ہی جاں بحق ہو گئے۔
جاں بحق ہونے والوں میں ہارون خان، محمد شعیب اور واحد شامل ہیں، جبکہ ایک دیگر شخص کی شناخت سے متعلق معلومات حاصل کی جا رہی ہیں۔
لاشوں کو پوسٹ مارٹم کے لیے ڈسٹرکٹ ہیڈکوارٹر ہسپتال منتقل کر دیا گیا ہے۔
پولیس نے بتایا کہ واقعے کا ابتدائی مقدمہ درج کر لیا گیا ہے اور تحقیقات شروع کر دی گئی ہیں۔ حکام کے مطابق حملہ آوروں کا سراغ لگانے کے لیے مختلف پہلوؤں پر کام جاری ہے۔
